翁靜晶是一位愛貓、惜貓之人，家中養了16隻貓，但其中一隻17歲愛貓Snowflake本月初過身，令她非常難過。

近日翁靜晶看過一篇猶如人間煉獄的非法繁殖場專題報導後，令她感受更深，希望籌組一個法律團隊，招攬三至五名志願律師，及義工跟進相關投訴個案。翁靜晶認為事件乃刻不容緩﹕「報導講狗場點對待繁殖嘅狗，有啲兩隻腳膝頭都差咗出嚟，乳房生瘤都仲要繼續生嚟賣錢，真係好唔人道。小動物係無助嘅，困喺籠中俾人咁虐待，係一個生命，眾生受苦嘅問題。」希望靠人民同傳媒力量監察政府機構做多點事。

而翁靜晶一直支持領養，家中16隻貓(包括Snowflake)只有兩隻是購買，她解釋﹕「一隻係細女14歲時買嘅，另一隻係寵物店半賣半送，因為當時隻貓病得好嚴重，唔救佢就唔得。其他大部份係領養，或貓再生貓仔。」見翁靜晶養好多黑色貓，但黑貓常被指「唔吉利」、「好邪」而被遺棄率偏高，翁靜晶反而不介意，還表示從貓身上學到兩件事﹕

「無論咩顏色嘅貓都一樣咁可愛，尤其新一代嘅貓，睇到父母好愛錫仔女，呢種純潔親情，我身邊睇唔到咁無條件嘅愛，令我好感動。」

「我後生時買過好多皮草，但當時冇諗過件衫背後，令動物帶嚟幾大嘅痛苦。但當我接觸咁多貓之後，我慢慢用手摸佢哋，發現原來皮草喺來自一樣咁可愛嘅動物，令我知道我以前嘅價值觀係錯，所以我好感恩我有呢啲貓。」