特首林鄭月娥落令司局長要同市民connect，落區只係第一波，稍後仲要走訪區議會，據聞指明唔可以少過一粒鐘，少啲心力都未必頂唔順。財經事務及庫務局局長劉怡翔今日則喺上任後首度落區到訪南區，除咗探區內長者同有需要家庭派回歸禮物包，喺到訪傳統店鋪期間仲好認真地睇乜「膠」。

話說佢由香港仔海傍坐街渡去鴨脷洲大街後到訪海味雜貨鋪，了解店主喺港鐵南港島綫通車後嘅經營環境，期間有店員攞住花膠，向局長細心解釋點分公乸，劉怡翔凝神貫注咁聽講，唔知對「膠」有冇加深了解？。佢其後到訪一間傳統麵包鋪，仲買咗一打蛋撻畀同事醫肚。

有傳媒問佢自由黨中西區區議員陳浩濂係咪出任該局副局長？佢冇直接評論，只係話副局長嘅任命仍喺程序處理中。