西九管理局行政總裁連納智突然以個人健康同太太患病為由提早離職，八月就會走。呢次連納智中途起身、同上一位CEO謝卓飛情況唔同，因為佢真係因家庭問題告別西九，唔似謝卓飛疑似搵定好路數走人，所以西九管理局仝人都好體諒連納智，唔似上次有怪責成份。
一個咁大嘅管理局，始終要搵人掌舵，所以身兼管理局主席嘅林鄭月娥都話，會就CEO再進行全球招聘。有政界花生友就藐嘴，點解一定要搵外國人啫？唔通外國月亮特別圓？有知情人士就話喎，香港藝術文化人才真係唔多，所以要向外求，而且呢……本地嘅藝術文化界，個個都覺得自己超班，如果搵咗其中一個做leader，其他人肯定唔順眼，試問又點肯好好合作？始終認定由「鬼」壓「人」，先至係最好辦法。

查實「鬼」之嘛，香港冇咩？呢位政界花生友話，西九管理局成員、海洋公園前主席盛智文都係鬼佬啦，搵佢頂上，係咪仲好？佢既了解香港文化、又同各界關係良好，係冇藝術背景呀，但既然搵得前高官柏志高空降新職，都可以加個新位專責藝術輔助盛智文㗎啫。
聽到咁爆嘅人選，花生友都走去問過成日鬧西九流弊多嘅民建聯鍾樹根，佢今次難得唔鬧，讚盛智文係可以考慮人選。嘩，能夠令Tree根口下留情，盛智文不妨應徵幫吓西九解難咯。

花生友