【單身旅行團】趙頌茹約埋去韓國 黃芷晴嫌韓仔姿整
趙頌茹黃芷晴單身
黃芷晴同趙頌茹(Yu)今日到觀塘出席活動,同場仲有嚟自烏克蘭嘅雜技人玩雜技,阿Yu笑話:「我同芷晴好有緣份,成日會出席呢類活動,雜技、日本舞、踢波之類,我噚日已經有預感見到芷晴,我哋好叻獻醜,一字馬同平衡木呢啲實做唔到,做到嘅唔使搵我哋。」芷晴都笑謂呢個係佢哋嘅賣點。
提到芷晴剛失戀,阿Yu話:「我哋今日都有傾,應該要寄情工作,女人要靠自己做嘢,就算有冇戀愛都要做嘢,放眼世界。o依家自由身,除咗香港男士,其他地方嘅男士都可以考慮。」阿Yu笑言同時都自我鼓勵一番。佢哋仲心郁郁約埋去韓國旅行,問到係咪順便識番個oppa?阿Yu笑話:「我哋都係外貌協會,都鍾意靚仔嘅,不過去旅行唔一定係要識男仔,行街買衫識下朋友都得嘅,oppa對我嚟講有啲細喇,只有孔劉我會叫oppa,其他只係細佬。」
而芷晴就嫌韓國男仔太姿整,但有得一齊扮靚都係好事,佢話:「o依家未ready,享受吓單身先,寄情工作。」聖誕將至,問芷晴會唔會同媽咪梁潔華去旅行?佢就話:「旅行未得住,o依家多留喺屋企。」問到爸爸黃日華之前被影到去踢波時,感覺開懷不少,芷晴就話:「佢一踢波就開心,OK嘅,多謝大家關心。」
精選娛聞,喺晒《娛果》
http://fb.com/appledailyent