葉翠翠今日喺將軍澳出席王朝滴雞精簽約儀式，成為香港區代言人，佢嘅老公周曉東同5個月大嘅囝囝以父子裝齊現身，囝囝相當精靈趣緻，對住鏡頭一啲都冇怯場；當翠翠受訪時，佢老公負責照顧囝囝，期間表現出一副慈父冧樣。

翠翠透露囝囝叫周津羲，佢話：「搵師傅計筆劃，之後老公揀咗幾個字，最後由老爺奶奶決定。」而英文名Jak就由佢老公改。

講到囝囝現時體重係23、24磅，翠翠笑住話：「佢好大隻，因為我懷孕嘅時候已經有飲食嘅療程，所以變咗佢好長肉，通常BB喺4至6個月都有厭奶期，佢雖然都有，但好快就過，佢之後仲反彈飲得比以前多。」

今次擔任代言人，係咪想補好身體再追多個？翠翠話：「其實我未懷孕之前已經有食，仲喺社交平台上分享，廣告商知道之後就搵我做代言人，其實我向來都有補身，我本來想生個豬年BB，但又怕搞唔掂，或者生個豬尾BB，因為我、老公同囝囝都係雞年，雞同豬係好夾。」雖然翠翠0依家有聘用印尼傭人，但傭人最近返咗鄉下，同埋佢講明唔湊BB，所以翠翠話自己乜都一腳踢。

對於佢日前素顏同老公、囝囝去北角一間賣玩具同文具嘅舖頭shopping，翠翠話：「因為屋企冇玩具玩，所以老公揀咗兩個玩具。」怕唔怕老公對囝囝太愛錫，搞到屋企成屋玩具？佢話：「都會，因為社會0依家富裕咗，幾10蚊就買啦，不過暫時都係第二個玩具啫！」

想隨時獲得更多親子資訊，快啲like Easy PaMa Facebook啦！
https://goo.gl/1qWM8g