80後從事保險的劉小姐3年前以約360萬元買入遠東發展（035）黃大仙鑽嶺一個實用198方呎的開放式單位，坦言第一次買樓，收樓後覺得單位都唔錯，「可能專業人士（驗樓）覺得呢樣唔好，嗰樣唔好，但驟眼望落去，都覺得好順眼。最開心打開窗台，當初計算方位無錯到，係見到獅子山嘅！呢個就係當初點解唔買一房，而買studio嘅原因。除咗景觀，地板都好靚，又真係俾到咁高樓底。」

不過收完樓都有啲唔滿意，她指：「可能單位設計上要花小小心機，而家有兩面露台，真係要哂多少少錢去做閣仔，裝修費都貴咗，當初預12至13萬元，而家問過人要18萬元。無計啦通脹，3年來多咗6萬，接受到嘅。」她又稱，其他街坊收樓，有人話好，有人話唔好，有人話玻璃面裂咗，可能自己接受程度高，無咩特別，收完樓覺得自己單位值85分。

回想當初入市因由，她憶述，3年前睇樓市升，覺得香港小型房屋需求大，當時劏房月租都6,000至8,000元，仲要係唐樓。比較幾個新盤，包括紅磡環海‧東岸，唔鐘意密集式，最終揀返就近娘家黃大仙的鑽嶺，而且樓盤正正在獅子山下，獅子山精神嘛，以前都呢頭讀書，由樓盤行去鑽石山或黃大仙地鐵站都是10分鐘。

首期預算約30至40萬元，未計其他雜費，當時目標自住又得、投資又得，「抽新樓好睇運氣，我比較好少少，可能唔買六合彩，押哂啲運氣去抽新樓。」做保險是自僱人士，坦言：「初時真係擔心上唔到會，但發展商提供好多唔同方案，如果萬一上唔到會，可以揀建期，收樓之後先至供，俾我有足夠時間等樓價升幅，甚至儲多啲首期。」結果向銀行做按揭，「一定無穩定收入人士咁簡單，首先一定要有最近6個月收入證明，同埋佢會估算你返工啲佣金、花紅。當時來講，都算容易批咗。」樓價升，固然可喜，但唔升又有何計算在內？她話，進可攻，退可守。可以收返自住，唔住可以租出去，呢度好多人搵租盤。

記者：陳家雄

全球樓行 Dream House零距離
https://hk.feature.appledaily.com/overseasproperty