噚日除咗係華叔大壽，陳太同孖生妹妹陸方寧生、仲有專程由英國返港嘅前行政局首席議員鄧蓮如（Lydia）女男爵亦齊齊擺70大壽。三個咁有份量嘅女人一齊做生日，點止一個墟咁簡單，唔少嘉賓都係久違嘅政經界猛人，連大sir鍾士元都畀面到賀，一個唔覺意，仲以為時光倒流殖民地時代，唔講仲以為係港英權力核心舊生會敍舊㖭。

煲呔都想嚟敍舊

三位女士嘅壽宴喺灣仔君悅筵開12席，原本煲呔都係獲邀嘉賓之一，但陳太引述煲呔話，原本都好想嚟敍吓舊，但幾個月前已經應承咗第二個約會，嚟唔到。現屆特區政府到賀嘅，就有政務司司長唐英年。八方喺華叔壽宴唔見馬丁，但佢就有嚟賀陳太生日，咁又係嘅，話晒馬丁讀書時都約會過陳太。
身為主角，陳太同鄧蓮如都着紅色，陳太一身紅色旗袍，Lydia就一襲露臂吊帶裙，身形好fit，一啲都唔似70歲。陳太做代表向賓客致辭時話，最多謝嘅係佢哋嘅另一半，仲話做老婆喺屋企要做到thinklikeaman、looklikeagirl、behavelikealady、worklikeaslave，即係思想似男人，外貌似少女，舉止似淑女、工作似奴隸。
佢哋嘅老公亦好識做，自動自覺送上禮物，陳太收到老公送嘅一對白玉耳環，陸太收到隻名錶，Lydia老公唐明治就畀老婆自己揀樣鍾意嘅禮物，但Lydia仲未諗到要乜。其實噚日都唔係Lydia正日生日，因為佢係2月29號出世，所以不斷強調自己得18歲。三位阿太嘅生日願望離唔開身體健康同心境開朗，因為呢個係保持青春嘅秘訣。

呼籲捐錢當賀禮

咁多賓客到賀，本應收禮物都收到手軟，但陳太話佢已經呼籲班老友唔好送禮，最好改為捐錢去佢個慈善基金「長者之光」，贊助啲有需要嘅老人家醫治白內障。田少就話一共捐咗9,999蚊，即平均每人送3,333大元，寓意長長久久又生生猛猛喎。

mailto:[email protected]