劉德華監製、吳鎮宇、張可頤、譚耀文等主演嘅《香港華爾街》，係美國福斯傳媒集團（Fox）宣佈進軍亞洲嘅頭炮之一，劇集前晚喺中環九如坊拍外景，由於當時落緊毛毛雨，有份拍嘅好多時都喺帳篷入面休息。其間張可頤趁休息除咗對鞋，當佢發現有記者嗰陣，就有少少尷尬，搵咗兩個工作人員擋喺前面。拍攝中途，賭王四太梁安琪同細女超欣喺附近出現，原來佢哋同朋友喺九如坊食完飯，四太好奇問乜事？知道係拍戲，就問有乜人，仲講咗句：「哦！張可頤。」
《香港華爾街》噚日喺大潭舉行開鏡拜神儀式，吳鎮宇、張孝全、譚耀文、張可頤、陳家樂、蔡潔同潘燦良等都有出席，導演黃國強話華仔喺醫院卧床期間，仍要追收劇本。

遇華仔唔敢打擾

鎮宇喺劇中飾演金融專家，佢話喺公司見到華仔：「唔係病人樣，返公司都係記招樣，好整理，佢忙緊好多嘢，我冇打擾佢，佢又起唔到身，難得返一日工，好多嘢要處理。」
劇中飾演律師嘅張孝全話：「與余男有一點點親熱對手戲，未知親熱程度。」張可頤今次為《香》劇演出兩集，佢話：「另外有電視劇拍緊，同戚其義合作，
𠵱家係自由身，職業同個人都係。」
撰文：馮仁昭