關仁隱事:抑鬱天后閉關蛀書
患有抑鬱症嘅天后原本諗住復出拍新晉導演部新戲,點知佢發覺個劇本好有問題,劇情發展唔合理,結果佢又同公司講話唔拍啦。因為天后唔肯做,電影公司又冇乜意思開呢部戲,新晉導演只好將部戲攞咗畀另一間公司開。天后自從嗰套《短歎氣》票房死得好慘後,對拍戲真係冇乜信心,成日喺屋企做蛀書蟲,仲要乜類型嘅書都睇,唔怪得連帶佢嘅文筆都有進步啦。
谷咗幾年都谷唔起嘅男子組合GIRL,換咗新成員之後都仲冇乜起色,唱片公司特別安排咗佢哋搵菜企老師學唱歌,但係成員雞仔成日都唔去上堂,有人話佢唱得唔好,佢就話係因為菜企唔掂冇料到,又教得唔好,後來呢件事俾菜企知道,激到唔想再教佢,雞仔入咗行咁耐都仲唔識得勤力啲、虛心啲,隨時俾新成員超越,唔通佢真係想喺呢行消失?
由細路組合出身嘅劏尾向來都唔識潔身自愛,平時恃住有幾個fans,就未紅先驕。本來藝人出事,公司都唔會想佢死,好似皇家御准公司咁,佢哋個個藝人衰完之後返出嚟,個款都仲好似攞獎咁。不過劏尾就冇咁好彩,皆因佢作個人發展時不被睇好,搞到公司同事要四圍碌人情卡,叫人幫拖支持吓。點知佢咁唔自愛,醉酒駕駛之後又爛賭借貴利,傷透同事嘅心,所以公司對佢已經採取放棄態度,放逐佢去內地拍戲,由佢自生自滅。
Textby關仁