落選立法會議員後，民主黨黃成智近日突然高調支持有條件下「袋住先」，立即引來政圈陰謀論者連番質疑，連黃成智前日搞記招嘅地點，亦成為為收錢撐政改嘅「疑點」，懷疑佢選擇位處元州邨元泰樓地下嗰個「元州邨居民協會」，係屬於建制派九龍社團聯會地區組織，花生友追查下發現，誤會由少咗一粒字引起。
花生友翻查紀錄後發現，九龍社團聯會確實有個地區組織叫「元州居民協會」，但同黃成智借場嗰個組織少個「邨」字，而且係位於元泰樓16樓。而黃成智揀嘅呢個協會，過去亦曾被民主黨涂謹申、黃碧雲等借用，辦公室亦貼有民協區議員梁有方揮春，睇落都係似親民主派組織多啲。

現時住天台屋

除咗記招地點被質疑，據知黃成智嘅經濟狀況亦成為關注焦點。日前坦言「老婆現時養緊我」嘅黃成智，據知現時只居住於300呎天台屋，單位屬於其父黃昌達，黃成智因為已變賣單位供兒子去美國讀書，𠵱家不再持有物業，生活主要靠每日需洗三次腎、做半職社工嘅老婆維持，經濟環境唔多理想。
花生友聽聞黃成智落選議員後，都有試過努力搵錢，但可惜無論搞雜誌，定係喺土瓜灣搞社企，都係蝕錢無功而還。黃成智亦同花生友承認，之前試過搞本「家生活」嘅雜誌，但最終都唔成功，社企餐廳亦蝕緊錢，難怪有人聽聞黃成智近日正積極考慮做返「老本行」，喺北區再戰區議會，最近亦傾緊老人院生意。
花生友