來自意大利、28歲世界級型仔博士Pietro Boselli，憑住1.85米身高、42吋強勁胸肌、冧盡各地女士，Ig有近200萬追蹤用戶，成為網紅名人，更贏得「全球最靚仔數學教授」美譽。
Pietro噚日就喺倫敦飛到香港，準備喺後日出席一間餐廳開幕活動。噚日下晝5點幾，身穿黃tee爛牛嘅Pietro，孭住背囊喺閘口步出，公關公司就安排咗兩位大隻外籍保安接機護送，現場有近30名粉絲接機。

自拍來者不拒

雖然搭咗十幾個鐘飛機，Pietro仍然精神飽滿，見到粉絲笑容滿面，大會就送咗一紮鮮花畀佢。現場有兩名女粉絲要求selfie，佢都來者不拒，其中一人仲主動攬住影相，佢都冇拒絕。之後，Pietro就由外籍保安帶領，登上七人車離開。
喺倫敦UCL機械工程學系讀書嘅Pietro，修讀完博士課程後，14年返母校教數學，仲因為學生唔捨得走堂，締造咗100%出席率佳績。Pietro又係著名模特兒，6歲時畀Giorgio Armani發掘，又攞過歐洲健美模特兒冠軍，之後做埋阿Sir，成為「全球最靚仔數學教授」。佢喺Ig不時都會貼性感騷肌嘅廣告作品，短短唔夠三年，因「網紅」已狂升到近200萬追蹤用戶。
撰文：馮仁昭