韓國人氣樂隊FTIsland嘅成員李洪基噚日單拖抵港，為聽晚情人節當日舉行嘅個人演唱會做好準備。

李洪基一向都好鍾意香港，特別喺香港shopping，佢之前嚟香港就最鍾意行波鞋街，而噚日佢嚟咗香港之後，都即刻抽時間去行街街，佢先以一身黑色打扮去咗尖沙嘴嘅海港城購物一番，現身時有數名工作人員陪同，雖然佢已經戴咗黑色口罩，但由於佢排場十足，所以都被粉絲認出佢，加上佢都好錫粉絲，刻意將口罩拉到鼻子之下，等粉絲睇清楚佢個靚仔樣。

而李洪基專攻名店，行街時亦會問吓工作人員意見，由於有唔少粉絲聞風而至，所以現場都擠滿咗粉絲，都有成幾十人，場面好墟冚。據粉絲所講，李洪基晚上仲轉戰中環蘭桂芳，不過因為當時環境陰暗，所以就甚少人認出李洪基，但有粉絲想行埋去同偶像影相時，李洪基嘅身邊工作人員就即時阻止。

另外，李洪基噚日喺網上上載新照，仲留言話：「為咗更加悠閒咁逛街，明明提前一天來..你哋點知係今天嘅...啊噢，肯定係我哋之中出現咗間諜。」