人民幣資產越嚟越值錢,內地房地產自然有價;但香港都唔弱,沉寂一時嘅樓市已經復蘇。不過,香港勝在稅率低(呢句當然唔係同中產講),所以相比起祖國交稅天王,香港地產商對稅局嘅貢獻,真係蚊髀同牛髀。
根據香港稅務局喺今年5月時公佈,06/07年度,交利得稅最多嘅十間公司當中,只有兩間係地產公司,阿一係郭氏三兄弟嘅新鴻基地產(016),佢哋06年截至6月底止純利198.5億元,交咗15.52億銀利得稅。超人李嘉誠旗下嘅長實(001),06年12月底止純利180.75億元,交8.33億銀利得稅,十大排名中,只係排第七。
至於頭三名全部俾銀行覇晒,計有滙豐(005)、中銀香港(2388)同恒生(011),地產商?插針都難入。
[email protected]