一來因為今次疫症同食豬無關，亦冇豬隻感染死亡，世衞繼續用豬流感呢個名，無疑靠害各地豬農，事實上疫症改名唔係單純公共衞生嘅科學問題，而係政治決定；03年沙士襲港，世衞將疫症命名為嚴重急性呼吸系統綜合症，英文簡稱SARS同香港特區SAR好相似，高官即時同世衞交涉，可惜無功而還。
由此可見，如何命名新疫症顧忌甚多，叫做墨西哥流感，該國實抗議，名為北美流感，輪到美國、加拿大詐型，左諗右諗都係正名H1N1最政治正確，中立又穩陣；香港方面，特首煲呔冇跟隨世衞改口，噚晚開記者會時，仍然指呢種疫症係人類豬型流感，食衞局局長周一嶽稱考慮過正名，但因為過去一段時間都係以豬流感宣傳抗疫措施，一般市民比較認識豬流感，對H1N1好陌生，所以最終決定唔改名。
另有官方消息指，由於香港冇乜豬場，沿用豬流感唔會帶來重大經濟損失，所以唔改都冇問題，加上已印製大量豬流感宣傳品，海報、單張陸續出街，唔用豬流感成批宣傳品報廢，實俾市民閙。
煲呔話香港首宗豬流感病例，係由墨西哥經上海傳入香港，誓要同香港爭一日長短嘅上海，今次又輸俾香港，證明香港先係名副其實國際金融中心，否則該墨西哥人唔會過上海而不入，呢方面，香港今次認第一唔使面紅。
香港第二樣嘢反而冇咁叻，久唔久就爆一次瘟疫真係好彩過中頭獎。
mailto:
[email protected]