賭王與四太梁安琪所生嘅二仔何猷亨，平時多數喺娛樂版出現，今日澳博(880)召開股東會，竟然見到何猷亨一身藍色西裝，官仔骨骨，拎住公事包低調現身，佢參加完股東會匆匆離開，差啲走漏眼認唔到佢!

24歲嘅何猷亨就讀英國哈羅公學，2014年英國倫敦King's College工商管理學理科系畢業。聞說，佢畢業後返過澳博做實習，幾個月後，轉去一間初創企業見識一下外面嘅工作環境，2015年底返番去澳博正式返工，最初職銜係高級經理，上月升為助理營運總裁，直屬上司係老臣子兼營運總裁吳志誠。

睇番資料，近期澳博同其他公開活動都見到何猷亨身影，好似澳博一間員工中心開幕、澳博澳門打吡大賽頒獎，都見到佢孖住四太一齊出現。

何猷亨入咗澳博兩年左右，聽講乜嘢都要做，細至點樣做荷官，大至出去同人傾project都有佢份。近年澳博投資超過300億元，喺路氹興建新項目「上葡京」，項目涉及零售、餐飲、酒店、賭場，佢亦參與其中。不過，呢個項目都有阻滯，好似之前忽然發生火警，澳博行政總裁蘇樹輝指，會盡量加快工程進度，希望明年能夠開業。

今日問四太點睇何猷亨嘅表現，佢形容何猷亨係「打緊工」，將來會唔會入董事局就要睇表現。咁都啱嘅，就算係接班，都無理由咁快畀咁大壓力阿仔。

掌握財經生活資訊，即Like「蘋果ATM」fb專頁啦！
http://fb.com/appledailyatm