韓國人氣綜藝節目《RunningMan》（RM）嘅七位成員劉在錫、池錫辰、HaHa、宋智孝、金鐘國、Gary及李光洙，昨晚首次齊人現身亞博館舉行粉絲見面會，完騷後，劉在錫就帶同「周一情侶」Gary及宋智孝，先行飛返韓國，而金鐘國、HaHa同池錫辰就繼續留港，出席今午喺屯門VCity舉行嘅擊掌會，爭取最後時間同港迷近距離接觸。

雖然活動於下晝5點開始，但於3點左右已有近200粉絲到場等候，到4點半左右更迫爆商場，有超過500粉絲，令兩旁幾間店鋪都被迫落閘，可見《RM》人氣強勁。

約5點15分左右，三位人氣成員終於現身，粉絲即時以勁高音尖叫，當中金鐘國人氣最強勁。三子勁夾到暈以全黑打扮現身，似足三胞胎，而佢哋更以廣東話同韓文跟大家打招呼，又不時跟四圍粉絲揮手。