梁，唔一定要挺；京，卻不得不上。話說自從身兼全國政協副主席嘅董建華證實21號帶富豪團訪京後，政商界極關注自己係咪榜上有名，事關盛傳唔少大孖沙隨團，能夠獲邀實在係身份嘅象徵，而且個團仲獲國家主席習近平接見，普通訪京團邊有咁高規格吖！雖然盛傳訪京團意在穩定富豪軍心，希望大家幫阿爺手挺梁，但有政商界人士笑笑口話，上咗唔挺，你都奈我唔何㗎！
有人質疑盛傳李嘉誠會隨團，堅唔堅呀？抑或只係個煙幕，想𠱁更多人落叠？無論如何，面對老董本住「老董好、狼英更好」嘅心態瞓身力撐，難怪狼英噚日喺公開場合見到呢位大恩人時（圖），笑住上前握手致謝啦！