張家輝自導自演的新戲《陀地驅魔人》前晚在金鐘舉行首映，女主角郭采潔Deep V裙騷事業線撐場，家輝「哎吔哥哥」張學友、陳慧琳、沈嘉偉和邱淑貞夫婦、梁家輝、吳君如等現身捧場，星光熠熠。
問家輝對票房有否信心？他說：「自己睇咗五百萬次，唔係太緊張，但好在乎觀眾評語。」林嘉欣在電影演家輝的媽媽，對於嘉欣獲封金馬影后，家輝說：「我真係好開心，其實我哋私下冇乜交往，淨係合作呢套戲，但佢真係演得好好。」扮演水鬼的郭采潔因捱夜拍攝易水腫，她自嘲：「我是一個水腫的水鬼。」

梁家輝：幫到就幫

涉假學歷的蔡思貝在戲中孭飛頗重，但前晚卻缺席首映，不知是否避記者追問；而客串的學友被爆剪剩兩個鏡頭，學友笑說：「即係王家衛嗰啲？係咪即係偉仔（梁朝偉）喺《阿飛正傳》嗰種呀，咁就正啦，自己恨咗好耐。」對於林嘉欣封金馬影后，梁家輝則說：「呢個獎係李康生頒，頒開就係嗰個啦，正如當年我頒女配角畀舒淇，影后都係我頒。」學友聞言笑說：「吓，冇人頒畀我喎，咁我出年咪冇行，啱啱同嘉欣拍完部戲，佢係出爐影后，大家要嚟支持吓。」
專誠捧場的梁家輝呻香港沒甚麼新導演：「張家輝都好慘，上次嗰部好多都係搭膊頭。」問如搵你是否都搭膊頭？梁家輝即轉軚抵死說：「做朋友唔係吓吓搭膊頭，幫到就幫啦。」問學友今次客串有否收錢？他坦言：「咁都收得我仲係人嚟嘅，我只係拍咗一個晏晝，講出嚟都面紅啦。」梁家輝則說：「當年我拍君如都係收老毛，利是封好大。」
採訪：黃曉妍
攝影：沈健程