如果熟悉施治嘅球迷，應該知道佢好有音樂天份，平時成日放自己閒時打鼓啲片上YouTube，但原來阿仙奴隊友奧斯爾透露，呢位捷克門神Rap都好犀利。

奧斯爾接受阿仙奴官方雜誌訪問，就話當佢第一次聽到施治唱Rap時，成個人呆咗。「唔係講笑，我第一次接觸施治，真係畀佢迷住咗。大家都知，當時新球員一嚟到，就要喺隊友面前唱歌，咁施治就揀咗唱rap，仲要成首歌係佢自己作，rap晒成班球員同啲職員，大家都覺得好驚訝。」

不過，奧斯爾就話如果要佢揀「兵工廠歌神」，就一定係梅斯達菲：「我唔記得佢唱Justin Bieber邊首歌，總之就好聽。」