現年27歲的劉佩玥，13年參選港姐獲季軍，入行短短四年已獲無綫力捧，雖然未有機會「坐正」做女主角，但拍劇一部接一部，前年與伍允龍合作拍劇集《城寨英雄》傳撻着，惟有指因伍允龍經常要返內地工作，以致「玥龍戀」極速玩完。

不過，一直被指喜歡「收兵」的Moon，據知跟伍允龍拍拖期間，身邊已不乏兵仔，當中包括周志文、ViuTV藝人陳安立及翟威廉等。

Moon於上周六約下午2時，被讀者潘小姐透過本報「爆相爆片」，直擊她和周志文在新蒲崗Mikiki商場內一間泰國餐廳撐枱腳。潘小姐指周志文不時都拿着電話按，然後又會遞給Moon看，o氹到Moon邊食邊笑。潘小姐續謂：「食飯時周志文比較低調，講嘢都係細細聲，相反劉佩玥就唔介意周圍啲食客認得佢哋，講嘢同笑嗰陣都好大聲，有時仲會托住頭眼定定望住周志文。」潘小姐指二人這個午餐食得十分悠閒，嘆了近二小時始離開，而周志文則負責埋單。

被問到與周志文甜蜜撐枱腳，Moon回覆傳媒說：「我同佢哋兩兄弟（周志文、周志康）都成日一齊食嘢喎，好平常。」有指她食飯時不停笑，Moon即笑謂：「咁食飯梗係會開心啦，唔通乸住塊面食咩？」提到經常被坊間冠以「娘娘」稱號，Moon回應謂：「其實我同男仔食飯就話佢哋係兵，有啲詆毁佢哋，大家由始至終都係好朋友，咁唔通我同陳瀅、何雁詩佢哋出街，又係宮女，as a friend，每次聽到，都覺得唔舒服，雖然佢哋話得啖笑，但都覺得對佢哋唔公平。」

至於周志文回覆本報時，則倒模Moon的回應說：「我哋間中就約食飯喎，睇吓人多定人少，總之我哋係好知己啦！」

除兵仔周志文外，跟Moon同樣讀沙田呂明才中學的陳安立，二人除了是師兄妹關係，當年亦傳曾拍拖，有Moon舊同學報料指，二人當年在人前人後都有拖手及錫嘴，拍拖並不是秘密。Moon亦很懂得分配時間照顧一眾兵仔，包括與翟威廉合作拍劇，便傳二人秘戀三個月，收工後則照顧其他兵仔。