韓國女團GFriend將於下月16日來港，於香港亞洲國際博覽館Hall 10舉行由美亞綜藝、本地舞台及輝皇娛樂主辦嘅《2017 GFRIEND Mini Concert in Hong Kong》，令一眾港迷非常期待。而GFriend忙於準備海外巡演嘅同時，早前亦有演出韓國真人騷《無理的同居》，更被安排跟男團Super Junior成員金希澈「同一屋簷下」。

於早前播出嘅《無理的同居》中，GFriend跟希澈初次見面即為觀眾帶來不少有趣場面，當「房東」希澈發現新租客係GFriend全員後，嚇得即時崩潰跪喺地上「嚎哭」。聽到希澈喊累後，Yuju立刻提出為希澈按摩，Umji跟Sowon就到廚房準備食物，笑指希澈得到好似王一樣嘅款待。

GFriend於節目中散發「比格犬偶像」（意指淘氣又可愛嘅偶像）魅力，不時向希澈發動「嘮叨攻擊」，令平時口才了得嘅希澈都無言而對，希澈跟GFriend之間嘅互動彷如兄妹一樣，既有趣又溫馨。

出道兩年嘅GFriend，今年4月分別於首爾及曼谷舉行出道以來首個粉絲見面會，首爾站門票更錄得「全場3000席秒殺」嘅記錄，香港場門票就將於聽日公開發售，門票分為$1,480（VIP）、$1,080及$680三種，持有VIP門票嘅粉絲更可與GFriend六位成員進行擊掌。