上月21號先喺香港開騷嘅韓國男神李敏鎬,今日再次現身香港出席代言護膚品牌舉行嘅兩周年紀念活動。
今次係李敏鎬公開拍拖之後第一次嚟香港,所以吸引咗大批傳媒到場採訪,仲有100位粉絲有幸入場同李敏鎬見面。喺大約下午2點半左左,李敏鎬就現身,仲用招牌廣東話同大家打招呼,令粉絲叫得更瘋狂。
再次來港,李敏鎬就話兩個星期前來港開騷時已經得到好多人支持,今次又可以透過品牌活動同香港朋友見面好開心。提到李敏鎬過去多次為品牌去濟州拍攝,對濟洲感覺如何時,佢就話:「濟州係韓國最靚嘅島,每次去都覺得心情好好,能夠治癒心靈,而我亦覺得香港同濟州感覺好似,每次來都好舒服。」
李敏鎬又透露自己曾經為品牌參與過手巾設計活動,因為自己喺美術方面一向都冇靈感,所以話係自己嘅第一次,亦係最後一次設計手巾。唔知佢會唔會為女友秀智親手設計手巾呢?
其後,大會又邀請咗5個粉絲上台送禮物畀大家,李敏鎬雖然已經名草有主,但對粉絲依然好大方,對上台粉絲握手、攬攬咩都做,證明自己唔會有咗女友冇粉絲!