十幾年前，大家捧《YES!》雜誌場，除咗因為「城市驚喜」啲靚仔靚女、Miss Sex啲性知識之外，當然仲有扮盡全港人氣歌手嘅華少啦！動新聞成功召喚「我們的集體回憶」— 華少。佢仲係咪咁funny？現職項目管理，負責監督產品製作、活動及收購行動嘅七十後華少表示：「其實我都可以好正經。」

大專時修讀社會學嘅佢，2000年加入《YES!》，當時人工比現今大學畢業生仲要高。初期佢寫過小說、碟評影評Game評、答過愛情信，但並冇做過Miss Sex。點解佢會踏上扮嘢之路？「一出街就會收到好多卡拉OK宣傳單張，如果將呢啲加插入雜誌，當交稿咁交，我哋下晝就可以去食下午茶。」於是，佢就負責去女人街搵道具服飾，計劃扮邊個同做資料搜集。

被問到最滿意角色時，華少話一定係黎明！「佢太靚仔太有型喇，佢一走出嚟就係白馬王子，如果有個茂哩同佢做埋相同嘅嘢，肯定好好笑。」

2003、2004年，華少因雜誌易手而離開，輾轉成為今日嘅項目管理。努力工作、慳儉加儲蓄，令佢榮升人夫，但佢冇諗過要做人父：「我應該唔會生小朋友，我唔覺得呢個世界好到我希望帶一個小朋友嚟。」

事隔十幾年，最近佢為自己嘅惡搞金曲《姨婆掉眼淚》拍新MV：「其實有啲似一個大叔工餘去消遣。有人問我有冇睇《100毛》，有，真係幾好睇，佢哋好厲害，將我哋昔日一個星期做嘅事，濃縮喺一日搞掂。我真係冇資格評論佢哋，我會傾向扮歌手及明星，現在時興扮政治人物，我覺得好難比佢哋好笑。」

華少仲話：「我以前扮嘢，現在啲人就話惡搞，將來如果唔容許我再扮嘢，可能會有後果嘅話…我覺得唔使咁誇張。我講錯嘢，令朋友唔開心，對方可以同我講，唔使出律師信告我囉！」

採訪：陳小芝、懷鈺
拍攝：馮峰、廖達燊
化妝髮型：The Peppermint
場地：乾杯串燒居酒屋

延伸閱讀：
【中年轉型】寵物美容師低過最低工資的歲月
http://bit.ly/1oL5CyE

【敬業是王道】會考2分捱出頭世界朱古力大師成長記
http://bit.ly/1KWgUoD

講身份認同戥周子瑜唔抵河國榮：我係香港人
http://bit.ly/1lRxi39

【冇有怕】10年馬拉松心悠致青春：被淘汰是學習
http://bit.ly/1lRxuzb