容祖兒今晚喺尖沙咀出席麥當勞叔叔之家嘅慈善晚宴，希望可以喺香港建設多一個兒童之家。

唔知祖兒想唔想擁有一個屬於自己嘅小朋友﹖佢話：「如果有個人可以延續自己所有嘢，例如性格、特徵，會覺得好特別。」

問佢準備好生B未﹖祖兒話：「唔係話要就要，都要準備嘅，而且依家有工作，唔可以隨時生。」祖兒透露希望40歲前可以生BB。

至於男友劉浩龍係咪佢嘅生B理想對象﹖祖兒笑住咁話：「點知喎」，佢大讚男友係一個好開心嘅人，生B應該笑多啲。

另外，對於「演唱會之父」張耀榮因病離世，祖兒話：「我喊咗好耐，好唔捨得佢。我哋最後一次見面係喺春茗，嗰陣仲話要同佢影多啲相，因為我唔知下次幾時再開演唱會。我未知可唔可以去到佢嘅喪禮，因為要去橫店開工。」