丁子高與老婆楊千嬅結婚8年幾，一向人前人後都恩愛，默契十足，近月二人更自組經理人公司，實行兩公婆拍住上。

兩公婆家庭上亦甚合拍，日前千嬅開工，喺尖沙嘴The One搞緊簽名會，丁子高就要做「湊仔公」，負責照顧Torres喺同區行街。

當時丁子高同Torres父子二人被本報讀者楊先生透過「爆相爆片」捕獲，大概5、6點，身穿間條恤衫嘅丁子高就抱住Torres喺海港城出現，兩父子就行咗去梁詠琪兩公婆開嘅時裝Pop up店，丁子高一行入舖頭就叫店員幫手，拎手機幫佢影父子合照，楊生話：「佢影完相後，就拖實嗰仔，好緊張睇返張相先『收貨』，Torres就好乖跟實爹哋，睇咗一陣，不過就唔見佢哋有買嘢。」估計，丁子高都係帶Torres消磨時間，邊行街等千嬅收工，再會合慶祝母親節，睇返丁子高IG，當日佢貼咗一張同丁媽媽慶祝嘅相。

精選娛聞，喺晒《娛果》
http://fb.com/appledailyent