外表靚當然係人見人愛，車見車載，但心地好、有愛心更值得畀個LIKE，所謂相由心生吖嘛。恒隆地產（101）大公關關則輝（CF）今年聖誕長假就做咗件有意義嘅事，唔係飲飲食食開派對，而係山長水遠去咗廣西探佢資助嘅學生。

資助單親女讀高中

CF自09年開始支持「培苗行動」，資助內地幾個貧困地區嘅學生讀書，一年資助學費三千幾蚊，除開12個月，每個月只係三百蚊左右，就可以幫到一個內地學生完成三年高中課程，如果佢成功考上大學，咁就造就多一位大學生。知識改變命運，能確實幫一個人完成學業比就咁捐錢更加實際。
CF至今資助咗10個學生，由於農村女仔讀書嘅機會比男仔少，所以CF專揀女仔資助，特別係單親家庭嘅女仔。CF亦介紹咗5位大學男同學一齊參加資助計劃，舊年開始仲叫埋晒大家嘅太太、子女一齊去探訪學生，上周聖誕假期，CF咪就係一行21人去廣西探學生囉。