今日（16日）柏寶嘅座騎充滿話題性，第三場「阿姆利則」同第六場「連利進寶」雖然唔係頂班馬，但柏寶同姚本輝、蘇保羅兩廐已經有一段長時間冇攜手贏馬，係兩大盲門組合。

「阿姆利則」開鑼日（3日）五班草地1600米上名後，今次初跑泥地角逐1650米，柏寶話「阿姆利則」步幅大，而且跑法主動跟前，晨操快跳覺得隻馬唔抗拒泥頭，單憑呢三項因素，跑泥地已有優勢。

柏寶同姚本輝憑「蓮華生輝」捧走兩屆香港短途錦標同揚威新加坡，但自2014年元旦日贏出「百年歡」後，兩人就未合作再贏，同頭馬擦身而過。

至於柏寶同蘇保羅嘅代表作，首推07年憑「活力金剛」贏出香港打吡，但騎練2012年5月30日勝出「千笑」同「財寶鷹」一口孖寶後，勝馬紀錄一直封塵至今逾五年，今回合作「連利進寶」，蘇保羅讚匹馬近日試閘交出唔錯追勢，過終點後猶有餘勁，似乎狀態甚佳。

呢兩組騎練合作成績，或令馬迷卻步，但唔好忘記，柏寶上季尾贏出「將才」，相隔5年再同告東尼一齊頭馬相，所以今期「阿姆利則」、「連利進寶」絕非冇機會。