強國維穩機器真係太太太強大，特別是微博，一則要具名發博，二則誘你「綁定手機」，當你貼咗啲「危害國家安全」、「洩露國家機密」(如黑心食物、貪官橫行，甚至女生疑遭強姦再「被自殺」等等等等)，簡言之，你講真話，被河蟹事小，有維穩機器憑手機搵上門拘留你，先至大件事。

黃秋生身在香港，但在微博發文，鬧香港高官庸碌無能、反國民教育，都可以喺微博暢所欲言。但講六四，講中共，唔使諗。去年六四，黃秋生喺微博貼咗個「益」字，係，係一個「益」字，都被「蟹」。因為「益」字結構，似「六四」字形。秋生當時已於微博噴火﹕「可悲啊！恐懼文字，把中華文字也刪了罷！」

今年係「六四」24周年，秋生於微博寫咗乜嘢，已經不可考；用盡任何方法，都搵唔到。因為佢又食咗蟹。反而係6月6日凌晨4點幾貼嗰句﹕「不是那一天才可是那一天的(雪人公仔)」仍可保留。唔知秋生係咪想暗示，今年六四，京城再次六月飛霜；定係想講，唔一定要等到「六四」，先至被雪(河蟹)。

秋生冇解釋。但強國網民都get到，係講緊六四。發咗呢條博文五分鐘後，秋生再於微博寫道﹕

「uwantcrabi'llgiveyoucrab玩落去都冇癮，新浪自己打飛機啦」

緊接住，6月6號凌晨4點23分，秋生再寫﹕「反蟹﹗」

4:43am﹕「不是反對，是反過來和對和諧的和諧。」

到6月7日，晚上11:11pm，秋生再於微博貼文，宣佈﹕「退出新浪﹗」

11:14pm﹕「看你們蟹的結果，我不是第一個，也不是最後的一個。」

11:15pm﹕「乾脆把我一次蟹了。」

11:21pm﹕「新世界見」

11:46pm﹕「騰訊見！」

11:48pm﹕「FB見!」

11:53pm﹕「去騰訊」

6月8日，00:52am﹕「處女座五個上升天蠍」

00:28am﹕「去FB」

00:42am﹕「這是最後的鬪爭，團結起來到明天，蟹呀!反動份子蟹共產黨人的國際歌呀!」

00:59am﹕「欲悲聞鬼叫我哭豺狼笑。」

咁短時間貼咁多個post，秋生一為發洩，二為鼓勵網民、特別係強國網民表態。秋生真係話之你，就連習近平訪美，佢都喺微博話習總係「他去美國見奧巴馬是談移民的。」係唔係國家機密嚟0架﹗