林海峰（Jan）將於9月17至20號喺紅館舉行「是但噏我願意」talk騷，噚日喺紅磡開記者會。阿Jan以小木偶長鼻造型出現，仲許下幾個承諾，當中包括：是但男捧場會同佢一齊是但噏、有o靚模到場會喺場外設一個名人簽名區等。
當問到阿Jan點解要整長個鼻，佢就扮一眾被懷疑整容藝人嘅答法，就係例牌否認，佢話：「我睇報道啲人整眼整耳整心口都話冇整㗎。」再問阿Jan有乜嘢身體部位想加長？佢話最希望係紅館個騷加場。

女嘉賓玩神秘

阿Jan又透露今次talk騷會將個場地借畀人結婚，四晚嘅內容會係最hit嘅話題，第一場講o靚模、第二場講整容、第三場係講你扯，最後一場就講我扯，但佢當然希望所有觀眾唔好扯（離場）。
有指阿Jan會邀請葛民輝以及一神秘女歌手擔任嘉賓，問到係咪佢老婆彭羚？佢講笑話：「未搵阿葛之前要搵醫生先，同埋佢個驗身報告，至於我太太就忙於喺沙灘玩水。」阿Jan又指今年推出嘅紀念品有禮餅、嫁妝、朱義盛同纖體療程。另外，今次talk騷嘅主辦單位冇金牌大風，阿Jan解釋雙方一路以嚟合作都冇合約，而且金牌只係幫佢發行唱片，所以唔係次次合作都有佢份。