譚詠麟和樂隊Mr.前晚喺九展舉行「RollingPower音樂會」，仲邀請關楚耀做表演嘉賓，Mr.成員Tom嘅女友蔡穎恩（Evelyn）都不避嫌捧場，佢仲睇到好鬼興奮，成個人跳晒起身。
不過音樂會雖然話由阿倫同Mr.演出，但前晚阿倫就只係同Mr.合唱咗3首歌，連一首獨唱都冇，搞到成個音樂會變相係Mr.迷你騷。

Mr.自薦做溫拿嘉賓

事後Mr.接受訪問就話佢哋啱啱去完北京出席風雲榜頒獎禮，仲得到樂壇新人獎，令佢哋好開心，都算係對校長嘅交代。對於阿倫只唱3首歌，Mr.就笑話阿倫要留番明年溫拿演唱會上表演，佢哋都話好想做溫拿演唱會嘅嘉賓，如果阿倫叫到就一定答應。
至於有指四大唱片將與無綫破冰，Mr.就話仲未收到公司嘅通知，前晚佢哋都繼續以廣東話接受有線同亞視訪問，不過佢哋坦言希望以最舒服同親切嘅語言接受訪問，但提到會唔會去《勁歌》頒獎禮時，佢哋就強調任何頒獎禮都會出席，仲話：「係party，當玩吓，我哋已經拎咗好多唔係獎項嘅嘢，賺咗好多經驗，心中富有，唔係睇獎。」