由尊尼事務所偶像瀧澤秀明、今井翼組成嘅二人組合「瀧與翼」成軍15周年，日前宣佈因兩人嘅發展方向漸有差異，決定無限期停止合作，但尚未到解散地步，噚日，佢哋亮相《Music Station》馬拉松式特備節目，作為組合停止活動前最後一次表演。

瀧澤秀明同今井翼着住白色西裝演繹《REAL DX》、《Venus》同《夢物語》三首作品，完成表演後佢哋拖住手謝幕。而節目期間，今井翼就突然親吻拍檔臉頰，瀧澤秀明即掩嘴扮尷尬，睇得現場粉絲相當興奮，報以熱烈歡呼聲。