水晶宮禮拜日喺英超作客以0:1輸畀般尼之後，今季聯賽踢四場輸晒之餘，仲一球波都未入過，連埋上季嘅統計，已經差唔多四個月、450分鐘無喺聯賽入過波，新任領隊法蘭迪保亞個位都係凍過水㗎喇。

英國《BBC》報道，對上一隊喺英國頂級聯賽踢四場輸晒同無入過波嘅，已經係1924/25球季嘅Preston North End，足足係93年前嘅事。由英超開始數落去，今季英國足球下一隊同水晶宮一樣嘅球隊，係186位之後、一隊叫Oadby Town嘅球隊，可以見到水晶宮嘅情況真係差到無人有。

講返今季英超，水晶宮同般尼茅夫齊齊輸波後，成為英超史上第9同埋第10隊輸晒開季四場波嘅球隊，亦係英超史上第一次喺同一個球季，有兩隊波遇到咁嘅情況。如果韋斯咸喺禮拜一晚輸畀哈特斯菲爾德，更加會成為今季第三隊。不過，睇返歷史，英超之前八隊輸晒開季四場波嘅球隊，並唔係全部都要降班嘅。

球季　球隊　最終排名
1993/94　史雲頓　22（降班）
1997/98　阿士東維拉　7（成功護級）
1998/99　修咸頓　17（成功護級）
2001/02　米杜士堡　12（成功護級）
2005/06　新特蘭　20（降班）
2009/10　樸茨茅夫　20（降班）
2010/11　韋斯咸　20（降班）
2012/13　修咸頓　14（成功護級）