講番馬丁嗰筆先,唔好睇佢噚日咁風騷,俾萬千媽媽簇擁,事實佢內心唔知幾鬼失落,原本佢噚日應該同太太一齊飛日本,參加《信報》創辦人林行止個仔娶老婆嗰餐,但因為近排好多官司等緊佢打,惟有一支公留喺香港埋頭苦幹,寶貝仔祖詒見老竇咁慘情,book定枱同老竇食番餐日本菜,等佢唔使形單隻影過母親節咁話。八方聽到祖詒咁講,問馬丁囝囝算唔算孝順,馬丁咁答,「梗係孝順啦,我畀錢㗎喎!」咁又唔好咁講,其實後生仔呢,一年365日都為事業拼搏,一唔係就拍拖至上,肯抽時間陪吓兩老,算係好有心㗎啦,馬丁雖然講就話自己畀錢,其實個心應該好甜就真!