有種閨蜜，叫黃翠如與唐詩詠！自己得到幸福，都想好姊妹同自己一樣過得快樂，就好似黃翠如咁。同蕭正楠拍拖結埋婚，經常放閃，就知翠如BB好幸福。眼見閨蜜唐詩詠未有著落，翠如BB一有時間都會同佢四圍去，呢日，佢就陪老友行街買衫行足兩粒鐘。詩詠喺店內左揀右揀左試右試，會keep住問翠如BB意見。近期趕拍新劇《使徒行者3》嘅翠如BB，雖然等到放蚊，但仍然好樂意陪老友。試完一大輪，詩詠好滿足咁同翠如BB行出店舖，見到商場內聖誕嘅佈置，詩詠好有童真咁行埋去影相，翠如BB負責做攝影師，影完即睇。



雖然嚟緊嘅聖誕節，對詩詠嚟講係一個lonely Christmas，不過，佢已經決定咗會一個飛泰國，喺當地上一個冥想、蟬修嘅課程，唔使人陪。翠如BB一直都好想撮合詩詠同馬國明，佢講過：「佢哋兩個好襯，只係差一個約會。」自薦做媒人嘅翠如BB，知道詩詠同馬明都想外遊，曾經想line up齊齊去旅行，製造多啲機會畀佢哋，可惜唔成功。學詩詠話齋，人大咗經歷多咗，就會更加珍惜屋企人，會抽多咗時間陪爸爸，以前唔會同佢回鄉探親，早排，佢先同爸爸返咗福州鄉下。就算同馬明幾襯都好，有種愛叫友情，就好似詩詠同馬明。

攝錄：陳亦龍

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難！】

親臨旺角做升級壹會員，即送「香港人：抗爭之夏」限量明信片

詳情地址