當年今日
關於我們

着小背心入寺廟 搞邊科呀?
仲根霞賣純情唔湯唔水

蘋果日報 2002/12/20 00:00


日本啲水着女星主要分為兩大類,一類就好暴露,一類就留直頭髮兼唔多化妝走清純「露」線,而後者近日比較出位嘅代表人物,睇怕都非仲根霞莫屬啦!
仲根霞幫雜誌影親相,都着啲好娘嘅衫同梳個out咗幾十年嘅冬菇頭,所以自九八年出道以來,佢嘅fans緣都係一般。但佢近排為咗宣傳兩套主演嘅新戲《八月幻影》及《GunCrazy~叛逆者的狂想曲》,前幾日佢主動玩玩新意思,幫雜誌《Flash》拍咗輯「與你一日遊」嘅即興相,即刻好有noise。

睇相晒身材
啲相嘅賣點並唔係霞妹好有心機咁逐張逐張寫感想,而係佢着咗一件鬼咁少布嘅小背心走去淺草寺睇相,晒身材晒得咁刻意,真係唔怕得罪神靈咩!
不過呢,霞妹就話今次輯相嘅主題係佢想像同情人拍拖時想去嘅地方,所以着少啲吸引男友在所難免喎!