皇家馬德里喺西甲主場被貝迪斯爆冷以1:0擊敗，2勝2和1負得8分排喺西甲聯賽榜第7位，比榜首嘅巴塞隆拿少7分，原來今場冇波入嘅皇馬仲有一個數據好尷尬，就係佢哋今季踢咗五輪比賽之後，全隊入波總數等如巴塞嘅美斯一個！

根據西班牙《馬卡報》報道，皇馬喺西甲開季以來五場比賽射入咗九球，當中對拉科魯尼亞同皇家蘇斯達分別入咗三球，對華倫西亞入咗兩球，對利雲特就入咗一球。至於上場啱啱以6:1大勝伊巴嘅巴塞，全隊就入咗7球，美斯自己一個就入咗九球，喺西甲射手榜領先，皇馬真係要急起直追先得喇。美斯入嘅九球來自對伊巴「大四喜」、對愛斯賓奴連中三元同埋對艾拉維斯嗰場梅開二度。