廣州白雲機場前晚完成咗佢七十二年嘅歷史任務,喺最後一班機起飛去湛江之後就功成身退,對於八方同一班老記嚟講,白雲機場有好特別嘅回憶。
話說當年時值一九八六年,海峽兩岸嘅關係重相當緊張同封閉,可以講得係不相往來,突然五月有一日,華航一架波音747嘅貨機,竟然被機長王錫爵係由泰國飛香港途中轉降咗去廣州白雲機場,話要投奔大陸,你話係咪大新聞,後嚟雙方喺香港秘密談判,結果王錫爵留低,機組人員同架機畀番台灣。
當日八方同一眾行家百幾人,就係企喺白雲機場嘅跑道邊目擊架貨機起飛一刻,當時八方攞住張外滙券去機場電報室排隊打長途電話報料,其他行家就攬住菲林跑去坐飛機趕相,但好唔好彩,輪到八方接通電話,香港方面話已經見到架機降落啟德機場,唔使報料啦,睇吓個鐘,剛好排咗近二十分鐘。
傳真︰2623-9278
電郵︰
[email protected]