今日跑快活谷仲要用全闊A欄，內檔馬一如所料演出甚佳，頭四場四個贏馬檔位，順序係4、10、4、3檔，反映內檔馬取得壓倒性優勢。到了第五場四班一哩，內檔馬繼續贏，呢次仲要係最內1檔馬建功，由楊明綸策騎屬於組合獨贏A1的李廐馬「駕善」，於1檔起步留前鬥後，直路外疊衝贏晒所有對手勝出，李易達與楊明綸師徒季內首度合作報捷，呢匹五歲馬第15次出賽卒之開齋，獨贏3.4倍，A1組合則齊頭派20蚊。
「駕善」同時成為首匹以李易達馬房名義勝出的「駕」系馬，李廐暫時季內兩win均於谷草取得，沙田仲未開齋。馬房距15場頭馬上岸，仍然遙遠。
大概馬迷都識以檔位揀馬，事關今場由1檔「駕善」勝出，3檔「升力」由潘頓跑第二，第三名係2檔巫斯義座騎「智高星」，全場最熱三駒，三重彩奀到只派590元，四重彩搭第四名冷門「怡德」則有8,209元。其中「升力」歷來41戰2冠9亞4季，認真易位難贏。