【START噏人話】D-Biz全城中伏 創科局呃盡中小企 10萬資助變$9,000（黎兆沖）
蘋果日報 2020/08/24 15:02
創科局D-Biz
D-Biz最初承諾10日快速批核，最後當然無影；就連「全額100%」資助亦已經唔存在。
前任創科局局長楊偉雄離任前推出的遙距營商計劃（D-Biz）等足經過4星期，上周終於有成功批出個案，本欄早在首日申請時已說過，這項計劃會成為新任局長薛永恒首個挑戰，結果仍然「好事變壞事」。當初計劃的承諾10日快速批核，最後當然無影；就連「全額100%」資助亦已經唔存在，有中小企申請8萬5，最終只批出9,000元，實批只有一成左右，玩殘一眾中小企。
創科局在計劃推出時曾表示，會採用「快速批核」方式，申請資料和所需文件齊備後，大約10個工作天內可通知申請結果。結果薛永恒上周「戴定頭盔」，在批出結果前指，D-Biz申請超出預期，嚴謹把關審批需時，由10個工作天，變成20個工作天，中小企的救急資助都成了「遠水」。
但遲到總好過冇到，有中小企老闆上周五終於等到電郵通知，但結果全城「媽」聲四起。「全額100%」資助就如前特首董建華的「八萬五」一樣，已經唔存在。
有例子就正正申請項目報價8.5萬元，最終批出只有9,000元；亦有訂閱月費計劃報價9萬元，卻只批出1萬多元。暫時聽到「最成功」的就是電商平台的訂閱計劃，申請約10萬元，最後批出32,000元。明明講好係10萬元，最後唔足額，即係呃人報名啫……
創科局早兩日講過，申請個案中，大約一半公司申請3個技術方案，平均申請資助額約20萬；約20%申請2個技術方案；約30%申請1個技術方案。睇埋生產力促進局數字，截至6月11日下午6時，秘書處共收到超過1.2萬宗申請。計劃至6月12日下午6時已批出160宗資助申請，批出的總資助額約為591萬元。
屈指一算，以超過一半公司申請約20萬，但平均每宗申請卻只批出36,875元，實批金額連兩成都不夠。如果中小企要「去馬」做個項目，則要補上8成錢，與當初的「全額100%」資助相差甚遠。
有中企小老闆收到結果，就同我講大呻搵笨，「幾萬蚊項目但只批幾千，咁我仲做唔做好？仲衰過科技券，起碼一開始都係講明比到75%，唔使晒大家時間。」計劃更不設上訴機制，致電生促區熱線，職員就「提供」兩個選擇，一是按原定計劃補上差價去馬，另一是找供應商再出報價，減少功能，再交到秘書處審批。
畀你呃一次，真係唔驚你再呃第二次嗎？如果再交上去，金額會否再調整就成未知之數，好似個老闆咁，本身報價10萬元的項目，如今只批出3萬元；如果將貨就價，重新報價值3萬元內容，政府批出的資助又可能大減至數千元。老闆就話，「根本玩死人，照去馬又未必有咁多錢，改報價又唔知會唔會少左錢，做又死唔做又死。冇心批咁多就唔好搞，搞完出嚟玩死班中小企。」
如果望返最新申請數字以及平均批出金額，5億元除以36,875元，一共可批出13,559宗，批晒現有申請宗數有突。其實薛永恒口指，有些申請水份好高，所以收緊審批，實際做法更似為交數，更大於真心幫助一眾中小企。又一次證明，一件好事交到政府手到，亦只會變成壞事。