嘩！牛高馬大孭住Minions背囊周圍去，佢哋係邊個呀？原來係馬德里體育會嘅法國前鋒基沙文同埋里昂嘅法國前鋒拿卡錫迪囉！佢哋一向係好朋友，最近仲孖住一齊去咗美國洛杉磯唞暑，由於基沙文好鍾意迷你兵團，見到Minions嘅背囊就梗係要買啦！

至於拿卡錫迪近期傳緊阿仙奴想斟佢，咁啱前排槍手亦同美國電影公司環球合作，幫佢哋套新戲《壞蛋獎門人3》宣傳，咁Minions雖然分咗出嚟獨立成為一套電影，但佢其實都係《壞蛋》入面嘅角色嚟，唔知佢孭Minions背囊同阿仙奴有冇關係呢。

另外，基沙文同拿卡錫迪仲「入鄉隨俗」，著住NBA球衣行街街㖭，至於效果好唔好就見人見智啦！