話說上周喺台北跑半馬，10點瞓得着嘅日子實在唔多，一年就一、兩次，每次都係因為第日要跑步。好怪，如果係踢波的話，就算更早要起身都唔會早瞓一分鐘，跑步就唔同，瞓少咗隨時多樣嘢瀨。

三點自然醒，腦筋清醒咗但身體髮膚未，熱水沖涼照頭淋，食麵包飲果汁，懶懶閒床上拉筋拉足半粒鐘。好怪，明知拉筋咁重要，偏偏平時練習就只會拉半分鐘。帶齊嘢，一個人走在四點嘅忠孝東路向起點進發，無幾耐就遇着同道中人：

「你是跑馬拉松嗎？是呀！」
「是這個方向嗎？對呀！」
「天氣不錯呀！是嗎？」
深夜搭訕，不太熱情都好合理嘅！

雖然對台灣有情意結，但今次亦唔係冇投訴嘅，起跑竟然全馬、半馬兩萬人一齊出發，逼咗五分鐘都未跑得郁，個個殭屍咁慢慢行，無發生意外算好彩。亦可能由於開得太慢，所以一到大路好多人包括我，就放監咁喪跑咗幾K，咁過來人都知道，開頭有幾耐風流，之後有幾耐墮後啦。投訴二，原本打氣係熱情，飲料係足夠，景色係怡人，但去到最後兩K時仲有一條大煞風景好窄好暗嘅隧道，人已經莫氣嘞，仲要進入空氣稀薄嘅環境，所以最後唔少跑友都以行代跑嘞，差啲引誘到我行埋一份，相比之下香港嘅西隧其實係五星級嘅跑道嘞！

完事，拐吓拐吓食早餐行誠品睇《康熙》瞓晏覺，呢種悠閒只有跑到死去活來之後享受先至唔內疚。瞓瞓吓收到短訊：華山有Show睇，預你？唔係唔想睇，但有乜Show好睇過愛隊大戰吖，惟有放棄宇宙人期待槌仔幫，上網揾定條LINK，萬事皆備，氣氛高漲直到開波之前，因為場波真係好悶，定係我確實已經筋疲力盡，總之回復知覺嘅時候，畫面已經斷線，上網Check吓又一場0:0，順便睇埋半馬賽果，快過上年嘅自己，但又慢過理想嘅自己，究竟理想同現實點平衡，過程同結果又點分輕重呢？我只係知道，喺呢一剎那，我係想再跑嘅。

文：Keyman（節目主持）