當年今日
關於我們

求驗客手記:
哥連斯帶挈奧利沙迪比

蘋果日報 2002/03/13 00:00


波蘭黑人國腳奧利沙迪比𠵱家喺歐洲嗰朵都算幾響,下季重話會加盟意大利班霸祖雲達斯。不過,原來佢有今日嘅成就,係要多得效力香港甲組隊澎馬流浪嘅尼日利亞外援哥連斯。
哥連斯話畀我求大俠聽,佢喺九五?九六球季後由香港嘅民信走咗去波蘭落班,重成為咗第一個去波蘭搵食嘅尼日利亞球員;咁啱當時佢個鄉里兼好友奧利沙迪比讀完大學喺歐洲發展得唔如意,試過去法國、意大利等國家試腳都冇回音,哥連斯見奧利沙迪比又幾好波,咪介紹佢去波蘭踢波。
結果,奧利沙迪比喺波蘭發展得不知幾好,重娶埋個波蘭老婆兼入咗籍。
𠵱家奧利沙迪比就打緊希臘嘅彭拿典奈高斯,下屆重話會去意大利掘金。唔知奧利沙迪比喺呢個夏天代表波蘭踢完世界盃決賽周之後,會唔會順道嚟香港多謝哥連斯呢?

哨牙度記招發火
國際米蘭嘅巴西球星朗拿度噚日終於返咗意大利,重開咗個記者會,點知唔夠兩分鐘就走人。事緣哨牙度一坐低就有記者問佢喺巴西參加嘉年華嘅事,佢即刻話唔會解釋,之後起身走人。朗拿度咁唔合作,唔通身有屎?

巴塞荷蘭兵認真現實
巴塞隆拿班荷蘭兵好似古華特日前就話,如果有得揀,寧願喺今日場歐冠盃贏利物浦,都唔寧願喺周末場西甲聯贏皇馬,事關就算佢哋幫巴塞攞咗今屆西甲聯冠軍,都唔保證自己喺巴塞重有前途,倒不如落足心機踢歐冠盃,吸引其他歐洲球會斟佢哋過檔好過啦!
范將軍開玩笑
中國國家隊隊長范志毅涉嫌郁手打人呢單嘢,愈搞愈大單,而喺前日中遠嘅操練,范大將軍亦冇到場,隊友都替佢擔心。不過我求大俠就收到風,范大將軍已經冷靜落嚟,佢由初頭唔認打人到𠵱家改口話:「小摩擦嚟,我同個司機開吓玩笑啫!如果真係郁手,後果就唔係咁啦!」大佬呀!乜搵啲咁嘅玩笑嚟開呀?