當年今日
關於我們

大雨連場驚奧運 - 左丁山

蘋果日報 2006/09/17 00:00


星期三上午掛三號風球,下午取消,令到馬會損失慘重,因為馬會在上午就宣佈取消賽馬,估計損失投注額近六億元,馬會嘅抽佣加餐飲損失近四千萬元,睇吓馬會幾時宣佈補賽,希望追得番。
但左丁山之估計損失就未必追得番咯。當晚有四隻馬一早知道係游水馬,操到狀態大勇,又夠運抽到好檔位,得到馬主朋友報料,練馬師對四隻馬之中,有信心贏兩隻,有運就贏齊四隻,位置四串一應該走唔甩。呢四隻馬跑亁快地比較差,落雨就得米咯。
哎吔,一聲取消,左丁山冇晒癮,馬主K睇見落雨就叫埋朋友預備去快活谷拉頭馬,臨時花門,更加冇癮。練馬師呢,面都青,因為幾隻勇馬,谷晒料。有齊天時地利,今鋪機會咁大,失諸交臂,多數補唔番,認真麻煩。你知啦,當今馬場競爭空前激烈;中小馬房要贏一場頭馬,十分不易,趁季初啲大馬房因為馬多,啲質新質高馬未有充足準備之際,搶番幾場頭馬可以安定軍心;到咗十月以後,大馬房蔡摩東大舉搏殺之時,中小馬房只能夠打游擊,吼準先至搏一場,可謂粒粒皆辛苦也。
因夜馬取消,突然間想起,八月九月乃打風落雨之時,到咗○八年八月為奧運馬術賽在香港舉行,如賽事期間,一連七日打風或落大雨,豈非好杰?愈諗愈驚,連忙周圍問,卒之搵到馬主N,馬主N呻完是晚走晒雞之後,亦嘻哈大笑,因為佢隻馬只能跑亁快地,見落雨就唔識跑,取消賽事令佢十分高興。講起嚟,佢隻馬好招風雨,計埋今次,已有三次因風雨而唔使跑!馬主N身兼RDA(傷健策騎協會)嘅宣傳工作,知道○八年奧運馬術賽嘅籌備工作,佢話:「唔使驚,現時體育學院之大運動場會改建成為有蓋馬術場,落雨唔會妨礙馬術賽。」咁都好,香港人到時唔會失面子。不過咁噃,林煥光住在馬場對面,日日睇到體育學院之改建工程,今個禮拜大雨連場,嚴重影響工程進度,相信佢有排擔心。