今朝(8月2日)沙田馬場兩宗「落樓」好驚險，呂健威隻「太陽驕子」同埋蘇偉賢隻「勝利雄心」先後係內圈踱步，突然間將鞍上人抛跌，兩個鞍上人都冇受傷，隻「太陽驕子」仲空馬走咗成個圈，好似出巡咁，走到冇晒力被捉番；反而隻「勝利雄心」就好乖，冇走脫到，仲企定定等番鞍上人捉。「太陽驕子」及「勝利雄心」都係上季轉倉馬，兩隻轉倉後都好快贏，尤其前駒係呂健威度五戰兩冠兩亞一殿，今季咁快開操，馬房先頭部隊。