當年今日
關於我們

《金雞》是非傳梁家輝曾拒演長毛

蘋果日報 2014/02/03 06:00

黃百鳴金雞

《金雞sss》係賀歲片,當然係想大家睇得開開心心,但想唔到因為兩場涉及政治戲份,有網民質疑戲中對長毛梁國雄之失實影射,以及疑似對「愛」字頭、黑社會收維穩費恐嚇反政府示威者行為「漂白」,開po痛批導演鄒凱光「軟性洗腦」。鄒凱光今晨就於fb上,更新status謂:「『君如:有咁多人喜歡你,就有咁多人憎你,共勉之』」借君如把口撐自己。但未幾呢個status已經刪咗。

影射「長毛」呢場戲引起咁大迴響,相信就連長毛本人都始料不及。不過就有傳飾演長毛嘅梁家輝,於拍攝呢場戲時曾表現抗拒,不過據知未有其事,只係以訛傳訛。

亦有網民於鄒凱光fb貼圖,話噚晚入場睇《金雞sss》,赫然見到《六福喜事》嘅黃百鳴!係真唔係呀?

有人反自然有人撐,高登嗰個「致鄒凱光大導演」嘅po,2月1號問po,至今已累積545個回應。此po係有巴打撰長文抒發對《金雞sss》嘅感受,警句如:「片尾由梁家輝色演身穿哲古華拉Tee嘅議員,大概係講自己每次係立法會掉完嘢就可以收工,個個月出8皮嘢糧!但係你絕無提及現實生活中激進派系議員,被趕出立法會後用咗幾多時間街頭抗爭,8皮嘢人工有幾多開支有幾多補貼左去搞社運!鄒凱光!你用一套笑片包裝用嚟洗人腦!仲xx過搞國民教育!衰過明刀明槍幫中共xx底嘅黃百鳴!」

亦有人就張家輝角色作回應,寫道:「張家輝角色代表昔日香港,堅持守護核心價值,一句『搵食啫』,就可以推翻晒我哋堅守嘅香港同堅持嘅核心價值,呢樣真係令我好心痛。」