吳建豪同新加坡富妻石貞善結婚5年，多次傳出關係破裂，據台灣《蘋果日報》指，吳建豪兩度向石貞善寄出離婚協議，而有石貞善密友就力數吳建豪，除咗婚後不斷與其他女性曖昧，大時大節都冇陪老婆石貞善。

其實吳建豪同石貞善婚後多次喺ig隔空對鬧，婚後一年，石貞善先喺ig爆粗留言：「merry fuxkin Christmas」、「我會用你給我的同等氣力去對待你」等，有網民講到吳建豪督信基督教，石貞善就反指：「甚麼信仰？假信仰，別要相信那些炒作，醒醒。」而吳建豪就反擊：「管好你的舌頭。」兩人最後互相取消關注。

石貞善之後不時都喺ig抒發感情，包括喺15年生日，就同一班朋友唱K慶祝，但就唔見吳建豪，石貞善又再補多刀，喺ig以文代圖：「stop checking for people that don't check for me.」（唔要關注啲唔關注我嘅人），弦外之音非常明顯。到咗16年，石貞善再留言稱「進入新章節」，又轉貼《牧羊少年奇幻之旅》著名巴西作家Paulo長文，當中字句包括「該終結了」，令人猜測兩人關係早已跌破冰點。

而石貞善日前就接受周刊訪問，講到婚姻，都只係淡然稱唔可以講太多，因為驚講錯嘢影響吳建豪事業。佢又話，兩人拍拖時已習慣分隔兩地，維繫唔容易，但如果真係有心做，距離同身處嘅環境絕對唔係問題。

精選娛聞，喺晒《娛果》
http://fb.com/appledailyent