李心潔與「高佬」高以翔喺太古城出席護膚品牌剪綵活動，就算心潔著住5吋高踭鞋，企喺高以翔側邊，仍然差一大截，心潔話：「今日著對鞋唔係特別高，我著唔到6、7吋高嘅鞋，之前都擔心企時唔知到佢邊度。」

最近心潔籌備緊第二次畫展，而拍張艾嘉嘅新戲《念念》9月上映，問佢怕唔怕被有份演出嘅梁洛施搶去焦點，佢話：「唔怕，佢咁耐冇拍戲，大家對佢會多啲好奇同興趣。」

作為馬來西亞人，對於馬航客機失蹤，心潔話：「好難過，冇諗過有咁嘅事發生喺我哋國家，同屋企人、朋友盡量多啲祈福，希望奇蹟出現。」

有指今次係劫機事件，佢話真相未知，希望政府及有關方面作多方面搜查資料，而佢以前有段時間都驚搭飛機怕遇空難。

另外，高以翔透露稍後拍兩套中、韓合資電影，4月開拍嘅係愛情戲。問到會同邊個合作？佢話：「有機會跟韓國演員、導演合作很開心，但暫時不能說跟誰合作，但她是資深女演員。」

之後佢會拍《骸骨之城》續集，亦有其他荷里活電影斟洽中。佢都話呢年好忙，冇時間拍拖，不過見佢廣東話進步咗少少，問佢會唔會識番個識講廣東話嘅女友？佢話：「以前來香港有學廣東話，慢慢學，無論跟男生女生，每天多講也會進步。」


爛片界盛事、由本報娛樂版舉辦嘅第九屆「金話梅電影選舉」（GoldenPlum）又嚟喇！請即click入網址投票，喺香港電影金像獎舉行之前選出爛片之霸！
↓↓↓
http://campaign.appledaily.com/goldenplum