由當年VCD煲劇文化開始，港人對日劇一直有種情意結，當今時代更可以同步收看，當中GEM（nowTV15頻道）今季就有三套新劇本月起同步播出，一班日劇迷又點可以錯過？

其實GEM係一條亞洲娛樂頻道，上季由龜梨和也主演嘅日劇《怪盜山貓》已在港睇到，而今季三套NTV新劇《極樂天使》，《千年派又如何？》、《談戀愛世界難》更會同步播出。由大野智夥拍波瑠嘅《談戀愛世界難》已於上星期開播，首集錄得12.8%收視。

至於大前日喺日本首播嘅《千年派又如何？》，由岡田將生、松坂桃李、柳樂優彌以三個踏入社會嘅年輕人帶出新一代心態，編劇宮藤官九郎當然係信心保證，其筆下日劇幾乎套套都深得劇集好評。

至於福士蒼汰夥拍土屋太鳳嘅另一新劇《極樂天使》，原定上星周六播出第一集，可是NTV因播出地震節目而臨時讓路，延至本周六開播，而GEM頻道都改到本月26日播出。近日福士蒼汰、土屋太鳳及扮演「死神」嘅拍檔鈴木亮平，亦各自在Blog留言慰問受災同胞。