今年係香港回歸祖國10周年嘅大日子，中央同港府當然會搞好呢場Show，以體現「一國兩制」嘅成果，到時肯定有唔少各國政要同高官出席，加埋大大小小嘅慶祝活動同示威遊行，作為香港治安支柱嘅警隊當然唔可以怠慢。影星任達華嘅胞兄、警隊「二哥」任達榮上個禮拜喺北京舉行人大、政協兩會開幕時，就率領警隊高層專程到北京取經，睇吓內地公安點樣做，為回歸10周年保安工作熱身。

八方問任Sir今次取經有乜收穫，好似有冇學到內地鐵腕打壓抗議示威者嗰套，或者唔播貝多芬改播革命歌，任Sir就大賣關子，只係話警方要等負責統籌回歸活動嘅小組拍板決定晒所有活動後，先至可以作詳細部署，𠵱家未有定案，佢話警方有豐富經驗應付任何場面，只要對症下藥就掂。任Sir信心十足，八方預祝長毛等示威常客好運啦。
任Sir又讚內地公安叻咗好多，好似安排啲VIP到人民大會堂開會咁，以前會一早封晒馬路，等啲VIP車隊通過，但咁搞法北京市民好唔方便、怨聲載道，𠵱家公安只會一路封一路行，即係當啲VIP車隊就快經過時先至會臨時封路，然後立刻解封，任Sir話呢方面同香港做法相似。