韓娛圈又有喜事喇!喺韓劇《星夢高飛》扮演音樂老師嘅李允智今朝就透過所屬嘅經理人公司MamooActors事務所宣佈,將會喺9月27日同圈外男朋友拉埋天窗。
據知準新郎係一個温和稳重嘅33歲牙醫,係李允智識咗10年嘅好朋友,但二人喺3~4個月之前先發展成為情侶。MamooActors事務所仲話:「長時間嘅相處令佢哋對大家產生咗信任,所以好順其自然咁決定結婚。」因為準新郎係圈外人嘅關係,李允智今次只會邀請屋企人、好朋友出席婚禮,而且唔會對外公開過程。
暫時証婚人、祝歌等婚禮事宜就仲未决定好,只知道婚禮會喺韓國嘅著名旅行景點汝矣島嘅63大廈進行。